Avilés, villa portuaria, llugar de nacencia del que foi l’Adelantáu de la Florida, Pedro Menéndez de Avilés. Visita a pie pel cascu históricu, percorriendo El Parche, la Plaza d’España, caleyando peles sos cais empedraes, soportales y ilesies. Vamos afondar na so historia visitando’l Muséu de la Historia d’Avilés. En xintando, vamos averanos al Espaciu Portus, onde vamos conocer la historia del puertu dende l’aniciu y vamos facer una visita guiada al esterior con catalexos, dende’l centru hasta la Bocana. Vamos acabar la ruta nel Centru Niemeyer, única obra creada n’España pol gran arquitectu brasileñu Oscar Niemeyer, con vistes al Puertu, les Naves de Balsera y la Pescadería Vieya.