Los nuevos curtios d´Elena Duque, Imanol Ortiz, Juan Caunedo y David P. Sañudo van inscribise en certámenes de relevancia nacional y internacional

Un total de 12 trabayos se presentaron a la última convocatoria del programa Curtiumetraxes Llaboral Cinemateca

14/07/2021.- Los curtiumetraxes nuevos d’Elena Duque, Colección privada; d’Imanol Ortiz, N-666; de Juan Caunedo, Guanabacoa: tierra de aguas, y de David P. Sañudo, Vatios, resultaron escoyíos pa formar parte del Catálogu de Curtiumetraxes de Llaboral Cinemateca. Llaboral Cinemateca ye l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura.

Presentáronse un total de 12 curtiumetraxes a la última convocatoria del programa Curtiumetraxes Llaboral Cinemateca, que tien l’oxetivu de facer difusión y distribuyir la producción rexonal de curtios en certámenes cinematográficos de relevancia nacional y internacional. La Comisión de Selección tuvo conformada nesta ocasión por Roberto Barrueco, director de MECAL PRO, Festival Internacional de Curtiumetraxes y Animación de Barcelona y de Mecal 360º (Festival Internacional de Cine 360º deRealidá Virtual y Realidá Aumentada de Barcelona); Cristina Moreno, responsable de distribución de Madrid en Corto y de la Escuela de Cinematografía y del Audiovisual de la Comunidad de Madrid (ECAM); y el cineasta Chema García Ibarra (Misterio, Leyenda Dorada), qu’alcordaron incorporar al catálogu estos cuatro trabayos pola so calidá artística y técnica, amás de pola so orixinalidá y la potencialidá a la hora de ser escoyíos en festivales.

Vatios de David P. Sañudo

Esti nuevu curtiumetraxe de David P. Sañudo (Ane, Un coche cualquiera, La colcha y la madre) afonda nel drama intimista con pingarates de thriller y un acabáu impecable, que nos cuenta la historia d’una ciclista que prepara les próximes Olimpiaes de Tokio como salida definitiva a un periodu de lesiones traumáticu. El tiempu apura y la posibilidá de buscar un atayu que la ayude a llegar a la meta preséntase como dalgo más qu’una tentación.

Sañudo sitúanos nel añu 2020. L’estáu d’emerxencia ye una oportunidá única. Por primer vez, la ciclista sabe que, por cuenta de les restricciones de movilidá, hai unos díes nos que nun pue haber controles antidopaxe por sorpresa.

Guanabacoa: tierra de aguas de Juan Caunedo

Siguiendo’l percorríu d’un ríu desde la naciente hasta la desembocadura, esti documental de corte esperimental de Juan Caunedo (Antes que llegue el Ferry, Sigmunds Container) consigue treslladar un mensaxe poéticu y comprometíu, que pon l’atención sobre la buelga tan dañina que dexa l’home sobre la naturaleza. 

Los nativos d’esta parte de L’Habana llamáronla "tierra d’agües": Guanabacoa. Un viaxe musical dende la naciente hasta la desembocadura d’un ríu que nos va descubrir dalgunes maraviyes y monstruos colos que vivimos.

Colección privada d’Elena Duque

Cineasta, crítica y programadora, Elena Duque (Cómo hacer un fanzine, De cara a la galería, Valdediós) métenos nun viaxe emocional al traviés d’una colección d’oxetos que se tresforman en recuerdos (o viceversa), que pue visitase tanto dende un puntu de vista arqueolóxicu como entendese como una autobiografía particular muda o un ensayu cálido sobre la nostalxa. 

Pa la cineasta trátase d’un inventariu filmáu d’una colección privada, que pue vese como una colección d’arte duldosa, pero tamién como una recopilación nel espíritu de la filatelia o l’arqueoloxía, o una serie d’oxetos y documentos a mou de muestrariu de recuerdos. El catálogu emocional d’una vida convertíu, igualmente, en ítem coleccionable.

N-666 d’Imanol Ortiz

Apegáu al xéneru del terror, N-666 d’Imanol Ortiz (Moda, Oculto) ye un curtiu tan curtiu como trepidante que propón una rellectura posmoderna y contemporánea del mitu de la mocina de la curva, dotándolu d’un chispín de carga social.

Nueche zarrada. Carretera comarcal. Un mozu conduz mientres repasa nel móvil les fotografíes d’esi mesmu día, cuando repara en que en dalgunes d’elles hai una presencia estraña. Al parar, comprueba que ta solu…

Tanto estos cuatro curtios escoyíos como los otros 8 que se presentaron a esta convocatoria, pasen a formar parte del Archivu de curtiumetraxes asturianos que Laboral Cinemateca pon a disposición de programadores, investigadores, profesionales y aficionaos, valiendo asina d’escaparate del talentu creativu asturianu y promoviendo’l desenvolvimientu del sector audiovisual del Principáu. Amás, tamién pasen a formar parte del Archivu del Curtiumetraxe Español qu’ellabora la Coordinadora del Curtiumetraxe Español.